பன்முக ஆளுமைமிக்க தமிழினி அவர்களது மறைவினால் பெருந்துயரடைகிறோம்! அவரது நினைவு ஈழத் தமிழினத்தின் அரசியற்கனவுக்கு வலுச் சேர்க்கட்டும்! – பிரதமர் வி.உருத்திரகுமாரன்

தமிழீழ விடுதலைப் புலிகள் அமைப்பின் மகளிர் அரசியற்துறைப் new-Gif1பொறுப்பாளராகப் பணியாற்றிய தமிழினி அவர்கள் காலமாகிய சேதி அறிந்து உலகத் தமிழினம் ஆறாப் பெருந்துயரில் மூழ்கியிருக்கிறது.
விடுதலை அடைந்த  சுதந்திர ஈழத் திருநாட்டில் பெண்கள் அனைத்து உரிமைகளையும் பெற்று சமத்துவமாக, சமூகநீதி மிக்க சமூகத்தில் வாழ வேண்டும் என்ற கனவுடன் தனது வாழ்வை போராட்டத்தில் அர்ப்பணித்த தமிழினிக்கு நாடு கடந்த தமிழீழ அரசாங்கம் தனது மரியாதை வணக்கத்தைத் தெரிவித்துக் கொள்வதுடன் அவரது குடும்பத்தினரதும் உலகத் தமிழ் மக்களதும் பெருந்துயரில் தன்னை இணைத்துக் கொள்கிறது.
தேசியத் தலைவர் அவர்களின் வழிகாட்டுதலில் தமிழீழத்தின் பெண் போராளிகள் போர்க்களத்திலும் அரசியல், சமூகத் தளங்களிலும் ஆற்றிய பெரும் சாதனைகள் அனைத்துலகின் கவனத்தையும் ஈர்த்தவை. பல அற்புதமான பெண் ஆளுமைகளை தமிழீழ விடுதலைப் போராட்டம் உருவாக்கியிருந்தது. பெண்கள் தொடர்பாக சமூகத்தில் நிலவிய இறுக்கமான மதிப்பீடுகள் காரணமாக பல்வேறு துறைகளிலும் பெண்களால் சாதனைகளை நிலைநிறுத்த முடியும் என்பது நிறுவப்படாத சமூக யதார்த்தமாக நிலவிய ஒரு சூழலில் தமிழீழ விடுதலைப் புலிகள் அமைப்பின் பெண் போராளிகள் பல்வேறு துறைகளிலும் சாதனைகள் படைக்கும் புதுமைப்பெண்களாக உருவெடுத்தனர். பல சிறப்பான தலைமைத்துவ ஆளுமைகள் உருவாகின.
இவர்களில் ஒருவராக சிறந்த தலைமைத்துவப் பண்புகள் கொண்டதோர் அற்புத ஆளுமையாக தமிழினி தன்னை நிலைநிறுத்தியவர். தமிழீழ விடுதலைப் போராட்டத்தில் பெண்களும் ஆண்களுக்கு நிகராகச் சரிசமமாகப் பங்குபெற வேண்டும் என்பதில் மிகுந்த அக்கறை கொண்டிருந்த தமிழினி அவர்கள் அதற்காக மிகவும் கடுமையாக உழைத்தவர்.
சமூகத்தில் நிலவிய பல்வேறுவகையான பிற்போக்குத்தனங்களுக்கு எதிராகவும் குரல் கொடுத்த தமிழினி ஈழத் தமிழர் தாயகத்தில் தேசிய விடுதலையும் சமூக விடுதலையும் பெண்விடுதலையும் அமையப் போகும் சுதந்திரமும் இறைமையும் கொண்ட தமிழீழத் தனியரசின் ஊடாக வென்றெடுக்கப்பட வேண்டும் என்ற தெளிவான சிந்தனையுடன் போராட்டக் களத்தில் நின்றவர். News-GIF-maveetar2015
தனது 18 வருட போராட்ட வாழ்வின் ஊடாக ஒரு பண்பட்ட, பக்குவமான போராளியாவும் தலைவியாகவும் உயர்ந்து நின்ற தமிழினி தான் சந்திக்கும் எவரையும் தனது கருத்துக்களால் கவர்ந்து கொண்டவர். மிகவும் தெளிவாக, நிதானமாக நட்புக் கலந்த முறையில் அவர் உரையாடும் பாங்கினால் இவர் தலைமை தாங்கிய தமிழீழ மகளிர் அரசியற் துறைக்கு வலுச் சேர்த்தவர். தம்மைச் சந்தித்த சிங்கள மற்றும் அனைத்துலகத்தைச் சேர்ந்த பெண் செயற்பாட்டாளர்கள், ஊடகவியலாளர்கள், இராஜதந்திரிகள் அனைவரதும் நன்மதிப்பைப் பெற்றுக் கொண்டவராக தமிழினி விளங்கினார்.
2009 ஆம் ஆண்டு மே மாதத்தில் தமிழின அழிப்பின் ஊடாக சிங்களம் ஈழத் தமிழர் தாயகத்தை ஆக்கிரமித்த வேளை சிங்களத்தின் போர்க் கைதியாகிப் போக வேண்டிய துர்ப்பாக்கிய நிலைக்கு தமிழினியும் ஏனைய ஆயிரக்கணக்கான போராளிகளும் உள்ளாகிக் கொள்கின்றனர். சுதந்திரவேட்கையுடன் நிமிர்ந்து நின்ற எமது போராளிகள் இத் தருணத்தில் பட்டிருக்கக்கூடிய வேதனைகள் எழுத்துக்களால் முழுமையாக வடிக்க முடியாதவையாகவே இருக்கும். தமது தோழர்களதும் மக்களதும் குருதியாலும் ஈகத்தாலும் கட்டியெழுப்பப்பட்ட தமிழீழ தேசம் சிங்களப்படையினரால் சிதிலமாக்கப்பட்டு, மக்கள் அனைவருமே தமது மண்ணில் இருந்து பிடுங்கி எடுக்கப்பட்டு முகாம்களுக்குள் அடைக்கப்பட்டு துன்புறுவுதைக் காணும் எந்தப் போராளியினால்தான் அதனைச் சகித்துக் கொள்ள முடியும்?
தமிழினியின் நிலையும் இத்தகையதாகத்தான் இருந்தது.
சிங்களப்படையினர் தம்மிடம் கைதிகளாகிய போராளிகளை சித்திரவதை செய்து துன்புறத்திய விதம் குறித்து எமக்குக் கிடைக்கும் தகவல்கள் எம்மை ஒரு புறம் தாளாத வேதனைக்கும் மறுபுறும் ஆறாத அறச் சீற்றத்துக்கும் உள்ளாக்கியிருக்கின்றன. தமிழினியும் மிகப் பெரும் கொடுமைகளைச் சந்தித்தே சிங்களத்தின் பிடியில் இருந்து வெளிவர வேண்டியிருந்தது.
பின்னர் குடும்ப வாழ்வில் இணைந்து கொண்ட தமிழினி அவர்கள் தனது நினைவுகளையும் உணர்வுகளையும் கவிதைகளாக, கதைகளாக வெளிப்படுத்தும் ஒரு படைப்பாளியாகத் தன்னை வெளிப்படுத்தினார். போராட்டக்களத்தில் அவரது பங்களிப்பும் சிங்களத்தின் சிறையில் பட்ட துயரங்களும் இணைந்த நிலையில் வரலாற்றில் நின்று நிலைக்கக்கூடிய நல்ல பல ஆக்கங்களைப் படைக்கக்கூடிய ஆற்றல் அவருக்கு உண்டு என்பதனை அவரது படைப்புக்கள் வெளிப்படுத்தின.
அவர் இன்னும் சில காலம் உயிருடன் இருந்திருப்பாராயின் அவர் காலத்தால் அழியாதவொரு படைப்பாளியாகவும் பெண்களதும் குழந்தைகளதும் நல்வாழ்வுக்கு உதவுபவராகவும், சமூக நீதி மிக்க சமூகம் ஒன்றைக் கட்டி எழுப்புவதற்கான ஒரு சமூகப்போராளியாகவும் தன்னை நிலைநிறுத்தியிருப்பார் என்றே நாம் நம்புகிறோம்.
தமிழினிக்கு தாயக, புலம் பெயர் மற்றும் உலகத் தமிழ் மக்கள் செலுத்திய இறுதி வணக்கம் மக்களுக்காக உண்மையாகப் போராடிய போராளிகள் எம் மக்கள் மனங்களில் நீக்கமற நிறைந்திருக்கிறார்கள் என்பதற்கான சாட்சியமாகத் தென்படுகிறது. மக்கள் மனங்களில் நிறைந்திருக்கும் தமிழினி போன்ற போராளிகளின் நினைவுகள் இப்போராளிகளின் அரசியற்கனவுக்கு வலுச் சேர்ப்பதாக அமையும் என்பது திண்ணம்.
தமிழினிக்கு நாடு கடந்த தமிழீழ அரசாங்கத்தின் மரியாதை கலந்த இறுதி வணக்கம்;!
தமிழரின் தாகம் தமிழீழத் தாயகம்.
நன்றி.
விசுவநாதன் ருத்ரகுமாரன் Gif 02

Leave a Reply

Your email address will not be published. Required fields are marked *

*